ភ្នំពេញ ៖ កាលពីរសៀលថ្ងៃទី១៤ ខែកុម្ភៈ ឆ្នាំ២០២២ រដ្ឋបាលរាជធានីភ្នំពេញ បានបើកដំណើរការសាងសង់មណ្ឌលព្យាបាលជំងឺកូវីដ-១៩ លើផ្ទៃដីជាង៧ហិកតា ដែលគ្រោងនឹងប្រើពេលក្នុងការសាងសង់ឲ្យរួចរាល់ក្នុងរយៈពេលមួយឆ្នាំ។
កាលពីរសៀលថ្ងៃទី១៤ ខែកុម្ភៈ ឆ្នាំ២០២២ អភិបាលរាជធានីភ្នំពេញ លោក ឃួង ស្រេង បានរៀបចំពិធីក្រុងពាលីដើម្បីចាប់ផ្ដើមដំណើរការសាងសង់ មណ្ឌលព្យាបាលជំងឺកូវីដ-១៩នេះ មានឈ្មោះថា តេជោសន្តិភាពរាជធានីភ្នំពេញ ដែលមានចំនួន ១១អាគារ លើផ្ទៃដីជាង៧ហិកតា មានទីតាំងស្ថិតនៅក្នុងភូមិកប់ស្រូវធំ សង្កាត់គោករកា ខណ្ឌព្រែកព្នៅ ដោយប្រើពេលដើម្បីសាងសង់រយៈពេល១ឆ្នាំ។
ការសាងសង់មណ្ឌលព្យាបាលជំងឺកូវីដ-១៩ នេះក្រោមការណែនាំរបស់ នាយករដ្ឋមន្ត្រីកម្ពុជា សម្តេចតេជោ ហ៊ុន សែន ដើម្បីបំពេញតម្រូវការចាំបាច់ ក្នុងការព្យាបាលអ្នកជំងឺកូវីដ-១៩។
ការចាប់ផ្តើមដំណើរការ សាងសង់មណ្ឌលព្យាបាលជំងឺកូវីដ-១៩នាពេលនេះ ក្នុងគោលបំណងដើម្បី ផ្តល់សេវាសុខាភិបាល ជូនប្រជាពលរដ្ឋ ក្នុងដំណាក់កាល នៃការរីករាលដាលជំងឺកូវីដ-១៩ ដែលមិនដឹងថាវានឹងបញ្ចប់ នៅពេលណាដូច្នេះត្រូវរៀនរស់តាមរបត់ថ្មីនៃសម័យកូវីដ ខណៈបច្ចុប្បន្ននេះការរីករាលដាលនៃមេរោគបំលែងថ្មីហាក់មានសភាពលឿនគួរឱ្យព្រួយបារម្ភ៕
